મેટ્રો સિટીમાં અને ધનિક પરિવારોમાં તો સ્ત્રીઓ પણ સોફા પરથી નીચે પગ માત્ર પાર્ટીમાં અને પાર્લરમાં જવા જ મૂકે છે.
આ તો વાત છે મધ્યમ વર્ગની જ્યાં આખા દિવસની બાઈ ના પરવડે.
પરિવાર સંભાળવાનો બોજ તો મધ્યમ વર્ગમાં જ ખબર પડે.
એ પણ જયારે પરિવાર સ્વાવલંબી ન હોય; એટલે કે પરિવારના દરેક વ્યક્તિ પોતાનું જીવનજરૂરી કામ કરવા સક્ષમ ન હોય, શારીરિક રીતે કે માનસિક રીતે કે વળી સામાજિક રૂઢિઓને લીધે!
સ્વાવલંબી પરિવાર ત્યારે જ સંભવ છે જો દરેક વ્યક્તિ સ્વાવલંબી બને, માતા-પિતા અને બાળકો પણ!
🍛 બાળકોને પણ બચપણથી જ પોતાનું કામ જાતે કરવાનું શીખવવું જરૂરી છે.
🍛 સ્વાવલંબી કે આત્મનિર્ભર સ્ત્રીઓ તો જોવા મળે છે, આત્મનિર્ભર પુરુષો ક્યારેય જોવા મળશે?
🍛 મતલબ કે પુરુષ કમાવાની સાથે-સાથે ઘર અને વડીલોની સંભાળ પણ રાખી શકે, પોતાની રસોઈ અને સફાઈ પણ કરી શકે.
🍛 જેને થાળી પીરસવાની જરૂર ના પડે, જેના વાસણો ઉપાડીને સિંક સુધી જાતે જ લઇ જાય અને સાફ પણ કરે. જરૂર પડ્યે પોતાના માતા-પિતાની સેવામાં પણ ટેકો આપે.
🍛 કમાઈ શકે તેવી પત્ની જોઈતી હોય તો પહેલા પત્નીને ઘર-કામમાં સાથ આપી શકે તેવી તૈયારી કરી લે.
વ્યવસાયી સ્ત્રીઓની મુશ્કેલીઓ
🍛 આજકાલ જે સ્ત્રીઓ નોકરી કરે છે તેને ઘરે આવીને બીજી નોકરી ચાલુ થઇ જાય. પુરુષ તો કામેથી આવીને સીધા જમવાની થાળી પર જ દેખાય. એ થાળીમાં ભોજન કેવી રીતે આવ્યું એ નો વિચાર સુદ્ધા ન કરે.
🍛 જમ્યા પછી પણ સ્ત્રીએ રસોઈ સાફ કરવાથી લઈને વડીલોની તબિયત અને દવા ઉપર નજર રાખવાની, બાળકોનું હોમવર્ક અને અભ્યાસ ચેક કરવાનો, અને આવતી કાલની તૈયારી પણ કરવાની.
🍛 આટલી મહેનત પછી પત્નીને બે વાત કરવા જેટલી પણ તાકાત ના રહે. અહીં જો પતિ ઘરની જવાબદારીઓમાં મદદ કરે તો બંને સાથે સમય પણ વિતાવી શકે અને પત્નીને થાક પણ ઓછો લાગે.
🍛 સયુંકત કુટુંબોમાં પત્ની એના પતિને કઈ કામ સોંપે તો સાસુ તરત જ કહે, એ કામેથી થાકીને આવ્યો છે (જાણે વહુ તો મશીન છે) જરૂર હોય તો મને કહે ને!
એનો મતલબ એ સમજવાનો કે છાનીમાની કરી લે, સાસુને તો કામ ચીંધવાની નથી!
શું કરી શકાય?
🍛 આ માટે દરેક પરિવારે પુત્રોને પણ પુત્રીની જેમ જ ઘર-કામમાં સામેલ કરવા જરૂરી છે.
🍛 જેમ દીકરીઓને ભણતરની સાથે-સાથે ઘર કામ શીખવવામાં આવે છે તેમ જ દીકરાઓને પણ શીખવવાનું ચાલુ કરી દેવું જરૂરી છે.
🍛 જયારે બહાર ભણવા જાય ત્યારે ડબ્બા ભરીને નાસ્તા મોકલાવ કરતા, સાદું ભોજન જેવું કે - શાક-ભાખરી,બટાકા-પૌઆ, ફ્રાઈડ રાઈસ એવું શીખવી દીધું હોય તો?
🍛 બહારના ટિફિન - જંક ફૂડ ખાવાની જરૂર ઓછી રહે.
સામાજિક બદલાવ
સમાજને બદલાવો હોય તો શરૂઆત પોતાનાથી કરવી પડે, સમાજ મારા-તમારાથી જ બંને છે.
સમાજમાં મોટા ભાગના લોકો એ જ સમજે છે કે ઘરકામ અને પરિવારને સાંભળવાની જવાબદારી સ્ત્રીની એટલે કે પત્નીની છે, એ વિચારસરણી જ બદલવાની જરૂર છે.
🍛 પુરુષોએ ઘરકામ કરવું એ નબળાઈ નથી, મહાનતા છે, ઉદારતા છે પોતાના અહં ને બાજુમાં રાખીને મદદ કરવી એ - દ્રષ્ટિકોણ બદલો!
🍛 સયુંકત પરિવારમાં તો એક જોબ કરતા વધારે કામ નીકળી આવે, જો કે એ વાત જુદી છે કે આજકાલ કોઈ કામ જાતે નથી કરતા - બાઈ નો જમાનો જો આવી ગયો.
🍛 બાઈ પાસે બધું કામ કરાવવું યોગ્ય નથી, હા એક-બે કામ કરાવી મદદ લઇ શકાય.
🍛 બને તો રસોઈનું કામ જાતે જ કરવું. કહેવત છે ને 'આહાર એવા વિચાર' - તે જ રીતે રસોઈ બનાવનારના વિચારો રસોઈ માં ઉતરે અને પછી જમે તેના મનમાં.
🍛 ઘરે રહેતી સ્ત્રીઓ પણ નોકરાણી નથી હોતી, પતિ જયારે કામે ન જવાનું હોય ત્યારે તો મદદ કરી શકે.
🍛 જમીને વાસણ પણ નથી ઉપાડતા એ પુરુષોને ઘરકામમાં સાથ આપવાનું સમજાવવું - એ લોઢાના ચણા ચાવવા જેટલું અઘરું જ છે.
જાતે કામ કરવાના ફાયદાઓ
🍛 બચત: નાના-મોટા કામ જાતે થઇ જતા હોવાથી બાઈની ઓછી જરૂર પડે અને વસ્તુઓની બચત પણ થાય.
🍛 સમય: ઘણા કામ એક સાથે થતા હોવાથી જલ્દી પુરા થઇ જાય, પરિવાર વધારે સમય સાથે વિતાવી શકે.
🍛 આરોગ્ય: વાસણ કે અન્ય સફાઈ તરત થઇ જતી હોવાથી ગંદકી ઓછી રહે અને આરોગ્ય સુધરે.
🍛 પ્રેમ: પરિવાર સાથે મળીને કામ કરતો હોવાથી પરસ્પર સમજણ અને લાગણી વધે - નજીક રહે, એક-બીજાની કેર વધારે કરે.
🍛 માનસિક શાંતિ: (મારુ ફેવરિટ કારણ) બાઈ ઓછી આવે કે ન આવે તો ઘરની વાતો બહાર ઓછી જાય અને બીજાની પરેશાનીઓ ઘરમાં ન આવે.
સ્ત્રીઓને સ્વાવલંબી કરવા માટે, શિક્ષિત કરવા માટે ઘણા પ્રોગ્રામો અને અભિયાનો આવ્યા, હજુ સુધી એક પણ અભિયાન પુરુષોને ઘરમાં સ્વાવલંબી કરવા માટે નથી જોયા!
આવે તો કે જો હો, મારા તરફથી પણ એક રજીસ્ટર કરીશ.😄
